36-vjeçari vetëplagoset me armë zjarri, arrestohet bashkë me shokun që fshehu armën

Mëngjesin e sotëm, rreth orës 02:40, në Spitalin Rajonal të Vlorës është paraqitur i plagosur në këmbë me armë zjarri shtetasi O. A., 36 vjeç, banues në Vlorë. Ai ndodhet jashtë rrezikut për jetën.

Nga veprimet e shpejta hetimore të kryera nga Seksioni për Hetimin e Krimeve në Komisariatin e Policisë Vlorë dhe nga kqyrja e kamerave të sigurisë, u konstatua se ngjarja ka ndodhur në lagjen “Hajro Çakërri”, në vendin e njohur si “shkallët e varrezave të dëshmorëve”. Sipas hetimeve, 36-vjeçari është vetëplagosur aksidentalisht me armë zjarri të llojit pistoletë.

Në momentin e ngjarjes ka qenë i pranishëm edhe shoku i tij, shtetasi G. M., 42 vjeç, banues në Vlorë, i cili pas incidentit ka kryer veprime për fshehjen e armës dhe, së bashku me të dëmtuarin, nuk ka kallëzuar ngjarjen në organet ligjzbatuese.

Në vijim të hetimeve, policia ka arrestuar në flagrancë të dy personat:

• O. A., për veprën penale “Armëmbajtja pa leje”;

• G. M., për veprat penale “Armëmbajtja pa leje”, “Moskallëzim i krimit” dhe “Veprime që pengojnë zbulimin e së vërtetës”.

Aktualisht, po punohet për gjetjen dhe sekuestrimin e armës së zjarrit të përdorur në ngjarje. Materialet procedurale janë referuar në Prokurorinë pranë Gjykatës së Shkallës së Parë të Juridiksionit të Përgjithshëm Vlorë, për veprime të mëtejshme.

“KORÇA BOOM”