Borë dhe stuhi në horizont, reshjet e para dimërore shtrihen në Ballkan

Ballkani po përgatitet për reshje të dendura bore, sipas parashikimeve të fundit. I ftohti arktik ka filluar të depërtojë edhe në Evropën perëndimore pas Skandinavisë dhe gjatë kësaj fundjave pritet të formohet cikloni i ri Gjenovian, i cili do të stacionohet në pjesët qendrore të Italisë dhe Detit Adriatik. Ky ciklon do të krijohet si pasojë e depërtimit të një mase të madhe ajrore të ftohtë me origjinë arktike mbi Mesdheun e ngrohtë.

Reshje bore priten në shumë pjesë të Francës dhe Gjermanisë, madje edhe në veri dhe verilindje të Spanjës. Tutje, reshje më të dendura shiu dhe bore priten në disa pjesë qendrore të Evropës, si në Austri dhe Zvicër.

Në Ballkan, reshjet e para serioze të borës do të ndodhin në ultësirat dhe kodrat e Sllovenisë, Kroacisë dhe Bosnjës e Hercegovinës, ku pritet të bjerë deri në gjysëm metër borë në disa zona. Viset tona, për momentin, nuk janë pjesë e ndikimit më të fortë dimëror.

Të dielën, një pjesë e këtij sistemi të ftohtë ajror mund të depërtojë në Kosovë dhe veri të Shqipërisë. Reshje bore priten në viset kodrinore-malore të veriut dhe verilindjes së Shqipërisë, si dhe në disa zona të Kosovës, por ende nuk pritet një atmosferë e fortë dimërore.

"KORCA BOOM"