Detyrimi për të punuar pas studimeve në Mjekësi shkon në Gjykatën e Strasburgut

Gjykata Evropiane e të Drejtave të Njeriut në Strasburg ka vendosur të marrë në shqyrtim ankesën e 36 studentëve të Universitetit të Mjekësisë së Tiranës, të cilët kundërshtojnë Ligjin 60/2023. Ky ligj parashikon detyrimin që studentët e mjekësisë të punojnë për disa vite në Shqipëri pas diplomimit, ose në të kundërt të paguajnë koston e plotë të studimeve.

Studentët pretendojnë se dispozitat e ligjit cenojnë të drejtën për zgjedhjen e lirë të profesionit dhe vendit të punës, duke vendosur edhe një barrë të rëndë financiare për ata që nuk mund të përmbushin detyrimin. Ata argumentojnë se masa krijon pabarazi sociale dhe penalizon më së shumti studentët që vijnë nga familje me mundësi të kufizuara ekonomike.

Në ankesën e tyre, studentët ngrejnë shqetësime edhe për shkelje të të drejtës për jetën private dhe lirinë e ushtrimit të aktivitetit profesional, duke theksuar se mbajtja e diplomave nga institucionet deri në përmbushjen e detyrimit për punë përbën ndërhyrje të pajustifikuar.

Më herët, Gjykata Kushtetuese e Shqipërisë kishte ulur detyrimin e punës së detyrueshme nga pesë në tre vjet, por studentët e konsiderojnë masën ende të tepruar dhe jo proporcionale.

Strasburgu do të vlerësojë nëse Ligji 60/2023 është në përputhje me Konventën Evropiane të të Drejtave të Njeriut dhe nëse detyrimet e parashikuara prej tij cenojnë të drejtat themelore të studentëve të mjekësisë.

"KORCA BOOM"