Fundi i aventurës për një trajner të Kategorisë së Parë, drejtuesit kërkojnë zëvendësuesin

Në kampin bluzi të Luftëtarit duket se po fryjnë erëra ndryshimi. Pas humbjes në Krujë ndaj Kastriotit, situata në klub nuk është aspak e qetë. Burime pranë skuadrës bëjnë me dije se trajneri Besmir Shabani është shumë pranë largimit nga drejtimi i ekipit.

Mësohet se palët pritet të ndajnë rrugët në fillim të kësaj jave, duke i hapur rrugë një drejtimi të ri në pankinën gjirokastrite. Deri më tani, nuk ka një konfirmim zyrtar nga klubi, por burime të sigurta pohojnë se largimi i Shabanit është vetëm çështje kohe.

Në Gjirokastër tashmë është kthyer në temë të nxehtë pyetja se kush do të jetë pasuesi i tij. Drejtuesit e klubit pritet të vendosin në ditët në vijim për emrin e ri që do të marrë përsipër detyrën e vështirë për ta mbajtur ekipin në Kategorinë e Parë.

Pavarësisht vështirësive dhe rezultateve jo të kënaqshme, Luftëtari mbetet me objektivin e qartë të mbijetesës. Megjithatë, për ta arritur këtë, klubi duhet të marrë vendime të shpejta dhe të guximshme, pasi kampionati po hyn në një fazë vendimtare dhe çdo hap i gabuar mund të ketë pasoja serioze për të ardhmen e skuadrës.

"KORCA BOOM"