Lajm i mirë për futbollin korçar – rihapet Akademia e Futbollit “FC KORÇA 2011”

Futbolli korçar merr një tjetër shtysë pozitive me rikthimin e një prej akademive më të suksesshme në historinë e zhvillimit të talenteve të rinj në qytet – “FC KORÇA 2011”.

Kjo është një ngjarje e rëndësishme jo vetëm për sportin lokal, por edhe për të gjithë fëmijët e vegjël që ëndërrojnë të bëhen futbollistë.

Sipas informacionit të konfirmuar, akademia do të nisë zyrtarisht aktivitetin në muajin qershor, duke grumbulluar brezin më të ri të futbollistëve, konkretisht fëmijët e lindur në vitet 2018-2019.

Me këtë hap, akademia synon të ndërtojë një strukturë të re që nga themeli, duke u bazuar në filozofinë e futbollit modern dhe metodologjitë më bashkëkohore të trajnimit për moshat e vogla.

Rikthimi i “FC KORÇA 2011” lidhet drejtpërdrejt me emra të njohur të futbollit korçar. Presidenti i ri i Akademisë është Vasian Ballço, ndërsa drejtimin teknik e merr një figurë emblematike e sportit korçar, Gjergji Ballço, një trajner me përvojë, disiplinë dhe pasion të vërtetë për punën me të rinjtë.

Kontributi i tij ka qenë thelbësor në ndërtimin e brezave që sot luajnë në nivele të larta – emra si Dean Liço, Kosta Vangjeli, Rei Peçani, Skerdi Xhixho dhe shumë të tjerë kanë dalë pikërisht nga kjo akademi.

Në kulmin e saj, “FC KORÇA 2011” kishte deri në 260 futbollistë të regjistruar, duke u bërë një nga akademitë më të mëdha dhe më të organizuara në vend. Në vitin 2018, ajo u bashkua me Akademinë e Skënderbeut, duke u kthyer në bërthamën e saj zhvillimore.

Tashmë, me rikthimin si entitet më vete, “FC KORÇA 2011” premton një standard të ri profesional, ambiente cilësore dhe një sistem pune që vë në qendër zhvillimin e fëmijëve jo vetëm si sportistë, por edhe si individë.

“KORÇA BOOM”