Letër e hapur, pse si socialist do të votoj për Vinjola Rotën më 11 maj në Korçë

Jam dhe do të mbetem socialist. Kam votuar Partinë Socialiste në çdo palë zgjedhje, jo për interesa, por sepse besoj se e majta është më pranë halleve të njerëzve të thjeshtë. Por këtë herë, vota ime nuk është thjesht për partinë, është për një emër: Vinjola Rota.

Në listën e mbyllur të PS në qarkun Korçë mund të ketë edhe emra të tjerë, ndoshta më të njohur, ndoshta më të vjetër në politikë. Por unë nuk dua më të votoj për të njëjtët njerëz që kanë marrë besimin tonë e janë mbyllur në zyrat e Tiranës. Dua të votoj për dikë që e njeh terrenin, që e njeh zonën dhe që nuk e harron fjalën e dhënë. Dhe kjo është Vinjola.

Vinjola Rota nuk është thjesht një kandidate, është një zë i pastër, një frymë e re, një grua që nuk ka frikë të flasë, të përballet dhe të kërkojë më shumë për qytetin e saj. Ajo nuk vjen me arrogancë, por me përulësi dhe vullnet për të punuar. Ajo nuk premton të gjitha, por angazhohet për gjërat reale. Dhe mbi të gjitha – ajo dëgjon.

Kush e ka njohur nga afër, e di që Vinjola nuk ka qenë ndonjëherë “emër për listë” apo “numër për statistika.” Ajo është një përfaqësuese që i përket kësaj toke, këtij komuniteti dhe që do të jetë aty edhe pas zgjedhjeve, jo vetëm gjatë fushatës.

Për këtë arsye, më 11 maj, si një socialist që kërkon përfaqësim të denjë në Kuvend, do të mbështes fuqishëm Vinjola Rotën. Jo thjesht për Partinë Socialiste, por për një të ardhme më të ndershme dhe më të afërt me njerëzit.

Sepse koha e emrave të rreshtuar mbaron aty ku nis koha e njerëzve që vlejnë.

“KORÇA BOOM”