Lojtarët që kërkojnë ndihmë mjekësore do të qëndrojnë jashtë 2 minuta

Vonesat e lojës janë një nga problemet më të shpeshta që cenojnë ritmin dhe bukurinë e futbollit, shpesh të shkaktuara nga dëmtime të njëpasnjëshme dhe hyrjet e shpeshta të stafit mjekësor në fushë. FIFA duket se ka gjetur një zgjidhje të re për këtë situatë.

Sipas mediave ndërkombëtare, Pierluixhi Kolina, përgjegjësi i arbitrimit në FIFA, ka propozuar një rregull të ri për rastet kur lojtarët kërkojnë ndihmë mjekësore. Rregulli i ri, i dërguar për miratim te IFAB, parashikon që çdo lojtar që kërkon trajtim mjekësor duhet të qëndrojë detyrimisht të paktën dy minuta jashtë fushe pasi largohet nga loja.

Përjashtim nga ky rregull bëjnë vetëm portierët. Sipas FIFA-s, kjo masë synon të reduktojë ndjeshëm simulimet dhe vonesat e panevojshme, pasi ekipet do të detyrohen të luajnë dy minuta me një lojtar më pak nëse lojtari "i dëmtuar" kërkon trajtim pa arsye të fortë.

Rregulli do të testohet fillimisht në disa kampionate arabe dhe në MLS gjatë sezonit të ardhshëm, dhe FIFA po konsideron vendosjen e tij në zbatim global sa më shpejt të jetë e mundur.

"KORCA BOOM"