Menaxheri i Kasapit rrëfen momentet e fundit dhe rrëzon dyshimet mbi shëndetin e artistit

Lajmi i trishtë për ndarjen e papritur nga jeta të këngëtarit të mirënjohur Shpat Kasapi ka tronditur publikun mëngjesin e sotëm.

Artisti 40-vjeçar nga Tetova, i cili e nisi karrierën që fëmijë, ishte një nga emrat më të dashur të skenës shqiptare, i njohur për baladat dhe hitet e tij, mes të cilave “Axhami”, “Pa ty s’jetoj” dhe “Kush të ndau prej meje”.

Sipas detajeve të fundit të raportuara nga gazetarja e Euronews Albania, Ferikan Iljazi nga Maqedonia e Veriut, konfirmohet se këngëtari ka ndërruar jetë herët në mëngjes pas një sulmi në zemër. Raportohet se ai nuk i ka mbijetuar atakut kardiak, ndërsa theksohet se nuk kishte vuajtur më parë nga ndonjë sëmundje.

Humbja bëhet edhe më e rëndë nga fakti se artisti kishte nisur përgatitjet për një rikthim të madh në ekran, pasi ishte konfirmuar si pjesë e edicionit të ardhshëm të “Big Brother VIP Albania 5”.

Anton Prendi, menaxheri dhe miku i afërt i Shpat Kasapit, foli për “Shqipëria Live” lidhur me ndarjen e papritur nga jeta të këngëtarit. Ai u shpreh se e ka të vështirë ta besojë këtë humbje, duke treguar se Kasapi nuk kishte pasur probleme shëndetësore që mund të çonin në një atak kardiak. Prendi shtoi se të dy kishin planifikuar projektet e reja dhe rikthimin e fuqishëm të artistit në tregun muzikor.

“Shpresoja që gjithçka të ishte ëndërr. Është e vështirë të besoj se nuk është më. Njihemi prej shumë vitesh, por prej tre vitesh punonim bashkë. Mesa di unë, nuk ka pasur probleme shëndetësore. Donte të hynte në ‘Big Brother VIP’, ishte dëshirë e të dyve. Unë kam insistuar më shumë. Biseda e fundit ka qenë për këngën që do bënte me Erik Lloshin.

I biri ka pasur probleme me të folurën dhe po kurohej. Shpati ishte shumë i përkushtuar ndaj tij. Ishte i afërt me të gjithë dhe nuk kishte konflikte me askënd. Unë do doja ta shihja edhe më të suksesshëm, i kishte të gjitha mundësitë.”

"KORCA BOOM"