Merret vendimi për vlefshmërinë e kartave të identitetit me afat të skaduar, të vlefshme deri më 11 maj

Një nga çështjet më të diskutuara ditët e fundit nga të gjitha subjektet politike dhe qytetarët ka qenë ajo e kartave të identitetit me afat të skaduar. Me afrimin e datës së zgjedhjeve, u ngrit shqetësimi i madh se shumë qytetarë nuk do të mund të votonin për shkak të mungesës së një dokumenti identifikimi të vlefshëm.

Sipas të dhënave të publikuara, bëhej fjalë për një numër jashtëzakonisht të madh personash, të cilët për arsye të ndryshme nuk kishin arritur të rinovonin kartat e tyre në kohë. Kjo situatë krijoi presion për të gjetur një zgjidhje të menjëhershme.

Për këtë arsye, Këshilli i Ministrave ka marrë një vendim të rëndësishëm, duke miratuar zgjatjen e vlefshmërisë së dokumenteve të identitetit me afat të përfunduar. Konkretisht, është vendosur që këto dokumente të jenë të vlefshme deri më 11 maj 2025, datë që përfshin edhe ditën e votimeve.

Pas kësaj date, të gjitha dokumentet me afat të skaduar nuk do të kenë më vlerë ligjore dhe qytetarët do të duhet të pajisen me karta të reja për të gjitha veprimet e nevojshme administrative.

Ky vendim synon të garantojë të drejtën e votës për të gjithë qytetarët dhe të shmangë përjashtimin nga procesi zgjedhor për arsye teknike.

“KORÇA BOOOM”