Nis ndërtimi i muzeut të Dritëro Agollit në Menkulas - një homazh për gjeniun e letrave shqipe

Në fshatin Menkulas të Devollit, vendlindja e shkrimtarit të madh Dritëro Agolli, janë vendosur piketat e para për ndërtimin e muzeut që do të mbajë emrin e tij. Ky projekt vjen si një vlerësim i vonuar, por i merituar, për një prej figurave më të rëndësishme të kulturës dhe letërsisë shqiptare, i shpallur me titullin "Nderi i Kombit".

Muzeu do të shërbejë jo vetëm si një vend kujtese dhe nderimi për jetën dhe veprën e Agollit, por edhe si një hapësirë edukimi dhe frymëzimi për brezat e rinj. Në të do të ekspozohen dorëshkrime, botime të rralla, fotografi, sende personale dhe dokumente që lidhen me rrugëtimin e tij letrar dhe jetën publike.

Ky projekt është një bashkëpunim mes institucioneve vendore dhe qendrore, dhe synon të shndërrojë Menkulasin jo vetëm në një pikë simbolike për kujtesën kulturore, por edhe në një destinacion të rëndësishëm kulturor dhe turistik në juglindje të vendit.

Fillimi i punimeve është një moment i rëndësishëm për Devollin, i cili ka dhënë emra të shquar në kulturën shqiptare, dhe tregon se kujtesa ndaj figurave kombëtare po kthehet në vepra konkrete.

Puna sapo ka nisur. Urojmë punë të mbarë ndërtuesve dhe suksese këtij projekti që do t’i japë dinjitet edhe më të madh historisë dhe kulturës sonë.

“KORÇA BOOM”