Një jetë për t’u kujtuar – Antoni Athanas, shqiptaro-amerikani që nuk harroi kurrë rrënjët

Më 28 korrik 1911, në një cep të thjeshtë të Shqipërisë, në fshatin Trebickë të zonës së Vakëfeve të Korçës, lindi një djalosh që do të bëhej simbol i suksesit dhe krenarisë për të gjithë shqiptarët në diasporë – Antoni (Anthony) Athanas.

Në moshën katërvjeçare, ai u shpërngul në Shtetet e Bashkuara të Amerikës, duke nisur një jetë të re me sakrifica dhe punë të ndershme. Nga rrugët e Bostonit ku shpërndante fruta, pastronte soba dhe shiste gazeta, ai nuk hoqi kurrë dorë nga ëndrra. Falë guximit, këmbënguljes dhe shpirtit të tij të palodhur, Athanas u ngjit drejt majave të industrisë së ushqimit, duke themeluar restorantin legjendar “Anthony’s Pier 4”.

Ky vend u bë jo vetëm një ikonë e kuzhinës amerikane, por edhe një pikë takimi për emra të mëdhenj të politikës, artit dhe diplomacisë. Në mesin e tyre ulen presidentë amerikanë, senatorë, artistë të njohur – por për Antoni Athanasin, krenaria më e madhe ishte mikpritja për çdo shqiptar që kalonte pragun e restorantit të tij.

Jashtë kuzhinës, Athanas ishte një patriot i përkushtuar. Ai mbështeti “Vatrën”, shkroi letra në mbrojtje të Kosovës dhe ngriti zërin për të drejtën shqiptare kudo që kishte mundësi. Ishte mik i Fan Nolit dhe u konsiderua udhëheqës shpirtëror për shumë shqiptarë në Amerikë, duke i mbajtur të lidhur me vendin e tyre të origjinës.

U nda nga jeta më 20 maj 2005, në moshën 93-vjeçare, por vepra e tij jeton. Ai është një nga ata njerëz që, edhe pse ndërroi kontinentin, nuk ndërroi kurrë zemrën.

John Kerry pati thënë: “Anthony jetoi ëndrrën amerikane dhe nuk harroi kurrë rrënjët e tij shqiptare.”Edward Kennedy shtoi: “Mirësia dhe bujaria e tij do të na mungojë të gjithëve.”

Figura e tij është një dëshmi e gjallë se suksesi nuk matet vetëm me pasuri, por me ndikimin pozitiv që lë pas në jetë dhe në zemrat e njerëzve.

“KORÇA BOOM”