Përplasje në distancë mes Myslim Murrizit dhe Arben Malajt – Akuza për vitin 1997, kërcënime, favore dhe përfitime politike

Një debat i ashpër ka shpërthyer në rrjetet sociale mes dy figurave të njohura politike, Myslim Murrizi dhe Arben Malaj, të cilët kanë shkëmbyer akuza të forta për ngjarje të ndodhura gjatë dhe pas viteve ‘90, përfshirë situatën e vitit 1997, përfitimet nga kompania “Bankers” dhe marrëdhëniet personale në sferën e pushtetit.

Përplasja nisi kur Murrizi përmendi ngjarje të vitit 1997, periudhë gjatë së cilës ai mbante pozicionin e nëndrejtorit të tatimeve, ndërsa Arben Malaj ishte ministër në qeverinë e sapoardhur të socialistëve. Murrizi pretendon se Malaj ka tentuar ta shkarkojë nga detyra, por ai ka refuzuar, duke e fyer dhe mohuar autoritetin e tij si ministër të asaj kohe.

Nga ana tjetër, Arben Malaj ka reaguar duke kujtuar një rast kur bashkëshortja e Murrizit ndodhej në gjendje të rënduar shëndetësore dhe kishte nevojë për të marrë vizë për trajtim jashtë vendit. Sipas Malajt, ndonëse vetëm pak ditë më parë Murrizi e kishte kërcënuar atë dhe familjen e tij me "të fortët e Fierit", ai kishte urdhëruar kabinetin e tij që të përshpejtonte procedurat dhe të sigurohej viza me prioritet për çiftin.

Në një nga deklaratat e tij, Murrizi shprehet:“Nuk të p*rdha as ty në mars 1997, kur doje të më hiqje si nëndrejtor tatimesh dhe të thashë që je ministër pa vota.”Ai gjithashtu përmend edhe vitin 2001, kur thotë se i është vjedhur mandati në zonën e Dushkut, dhe shigjeton Malajn për përfshirje në atë që e quan “marrëveshje politike të pistë.”

Malaj nga ana tjetër thekson se, pavarësisht fjalorit të ulët dhe kërcënimeve të Murrizit, ai ka zgjedhur të veprojë si ministër dhe si qytetar përgjegjës në ndihmë të një bashkëshortjeje në nevojë. Ai gjithashtu përmend zërat në media për përfshirje të Murrizit në pazare politike me mazhorancën aktuale, duke e ironizuar me fjalët: “Bëj të fal Taulantit!”

Përplasja ka tërhequr vëmendjen e publikut, për shkak të toneve të ashpra dhe zbulimeve të mundshme për marrëdhënie të vjetra politike, si dhe për shkak të përmendjes së emrave të përfshirë në çështje me interes publik, si rasti “Bankers”.

Deri tani, përplasja ka vijuar vetëm në rrjetet sociale, pa ndonjë reagim të mëtejshëm institucional. Megjithatë, ajo hedh dritë mbi tensionet e brendshme që vijojnë të ekzistojnë mes figurave të njohura të politikës shqiptare, edhe shumë vite pas largimit të tyre nga qendrat e vendimmarrjes.

“KORÇA BOOM”