“Profecia” e Vangjel Zguros/ Ja dy ekipet që, sipas tij, ngjiten në Superligë sezonin e ardhshëm

Skënderbeu dhe Pogradeci janë dy nga ekipet më të njohura të juglindjes që këtë sezon do të garojnë në Kategorinë e Parë. Të dyja skuadrat kanë histori, tifozëri dhe ambicie të larta dhe këtë herë nuk e fshehin aspak synimin për t’u rikthyer në elitën e futbollit shqiptar.

Kapiteni i Pogradecit, Vangjel Zguro, ka dalë me një deklaratë të fortë që ka bërë jehonë në ambientin sportiv: “Pogradeci-Skënderbeu do të jetë një derbi i bukur i juglindjes këtë sezon, por unë ju them se këtë derbi do ta shihni edhe në Superligë sezonin e ardhshëm. Këto dy ekipe do të ngjiten, për këtë jam mëse i sigurt,” – tha ai me bindje të plotë.

Deklarata e Zguros është komentuar gjerësisht, pasi vjen në një moment kur kampionati ende nuk ka nisur dhe skuadrat janë në fazë përgatitore. Megjithatë, ajo reflekton një besim të madh brenda grupit pogradecar dhe ndoshta edhe njohuri për përforcimet dhe projektet serioze që kanë nisur në të dy klubet.

Pavarësisht entuziazmit, mbetet për t’u parë se si do të rrjedhë sezoni, pasi konkurrenca në Kategorinë e Parë pritet të jetë e fortë, me shumë ekipe që kanë objektiva të ngjashme.

Megjithatë, një gjë është e sigurt, ndeshja Skënderbeu – Pogradeci do të jetë një nga më të ndjekurat dhe më emocionueset e kampionatit.

A do të jetë kjo “profeci” e Zguros një parashikim i saktë, apo thjesht një deklaratë e guximshme? Koha do ta tregojë.

“KORÇA BOOM”