Rënia më e fortë e ditëve të fundit, ja pse po ulet çmimi i naftës

Çmimet e naftës në tregjet ndërkombëtare kanë pësuar një rënie të ndjeshme pas sinjaleve për një përmirësim të situatës mes Shteteve të Bashkuara dhe Iranit.

Vendimi i Presidentit amerikan Donald Trump për ndalimin e sulmeve ajrore ndaj Iranit dhe përparimi i raportuar në negociatat për rihapjen e Ngushticës së Hormuzit kanë ndikuar menjëherë në reagimin e tregjeve energjetike.

Nafta e papërpunuar Brent, standardi kryesor ndërkombëtar, ra me rreth 5.6%, duke zbritur në afërsisht 83 dollarë për fuçi. Ndërkohë, nafta amerikane u ul me rreth 5.5%, duke u afruar pranë nivelit të 80 dollarëve për fuçi.

Investitorët reaguan pozitivisht ndaj mundësisë së një zgjidhjeje diplomatike dhe një uljeje të tensioneve në një nga rajonet më të rëndësishme për furnizimin global me energji.

Ngushtica e Hormuzit, pika kyçe e krizës

Ngushtica e Hormuzit mbetet një nga korridoret më të rëndësishme të transportit të naftës në botë. Para nisjes së krizës, përmes kësaj zone kalonin rreth 20 milionë fuçi naftë çdo ditë, duke e bërë atë një pikë strategjike për tregjet globale.

Megjithatë, përshkallëzimi i tensioneve ushtarake ka ndikuar në trafikun detar dhe ka rritur pasigurinë për furnizimin me energji.

Edhe pse SHBA ka sinjalizuar frenimin e veprimeve të reja ushtarake ndaj Iranit, Teherani ende nuk ka dhënë garanci të qarta për një ndryshim të qëndrimit të tij lidhur me Ngushticën e Hormuzit.

Ndërkohë, disa anije janë përballur me kërcënime gjatë përpjekjeve për të kaluar në këtë zonë, ndërsa situata mbetet e ndjeshme edhe në rrugët alternative të transportit të energjisë.

Tregjet ndërkombëtare tashmë po ndjekin me vëmendje zhvillimet e negociatave mes Uashingtonit dhe Teheranit, pasi çdo marrëveshje që do të rikthente qarkullimin normal të energjisë mund të ndikojë më tej në çmimet e naftës.

“KORÇA BOOM”