Rrugët e bllokuara nga moti i keq, qytetarët evakuohen me urgjencë

Moti i keq në Shkodër ka lënë të bllokuar 5 mjete me 9 persona në aksin rrugor Breg Lumi–Theth, si pasojë e shembjes së një masivi inertesh për shkak të reshjeve intensive.

Kryetari i bashkisë Shkodër, Benet Beci, njofton se pas marrjes së sinjalizimit për bllokimin e mjeteve, kapacitetet janë angazhuar menjëherë në terren për t’u ardhur në ndihmë personave të prekur.

“Bashkia Shkodër është angazhuar me të gjitha kapacitetet në terren sapo është njoftuar për bllokimin e 5 mjeteve dhe 9 personave në aksin rrugor Breg Lumi–Theth, rreth 100 metra larg urës së fshatit Gimaj, si pasojë e shembjes së një masivi inertesh për shkak të motit të keq dhe reshjeve intensive,” tha Beci.

Makineritë e rënda dhe fadromat janë vënë menjëherë në punë për zhbllokimin e rrugës, ndërsa një ekip i specializuar i emergjencave civile është nisur drejt zonës për të vlerësuar situatën dhe për të ndërhyrë me mjete të posaçme për evakuimin dhe garantimin e sigurisë së personave të bllokuar.

“Strukturat tona po punojnë me intensitet për të normalizuar qarkullimin dhe për t’u ardhur në ndihmë qytetarëve të prekur nga kjo situatë e krijuar nga kushtet e vështira atmosferike,” përfundoi Beci.

"KORCA BOOM"