Sekuestro në Pogradec: Prokuroria e Korçës godet pasuritë e një shtetasi të dyshuar për pastrim parash nga trafiku i drogës

Pogradec, 26 Shtator 2025 – Një tjetër goditje ndaj pasurive të përfituara nga aktivitetet kriminale ka ardhur nga Prokuroria e Korçës, e cila në bashkëpunim me Policinë e Shtetit ka sekuestruar disa pasuri të paluajtshme dhe të luajtshme në qytetin e Pogradecit.

Në qendër të hetimit ndodhet shtetasi E.B., i cili dyshohet se ka përfituar të ardhura të konsiderueshme nga trafiku ndërkombëtar i narkotikëve në Itali dhe Spanjë, të cilat më pas i ka investuar në Shqipëri në emrin e tij dhe të familjarëve të tij.

Pas një hetimi disa-vjeçar mbi procedimin penal nr. 208, të vitit 2022, për veprën penale "Pastrimi i produkteve të veprës penale ose veprimtarisë kriminale", Prokuroria pranë Gjykatës së Shkallës së Parë të Juridiksionit të Përgjithshëm Korçë ka paraqitur kërkesën për vendosjen e sekuestros preventive ndaj pasurive të dyshuara.

Pasuritë e sekuestruara përfshijnë prona të paluajtshme në Pogradec (tokë dhe banesa), automjete në emër të familjarëve, si dhe llogari bankare dhe të ardhura të tjera të dyshimta.

Në njoftimin zyrtar, Prokuroria bën me dije se ekziston dyshimi i arsyeshëm, i mbështetur në prova, që këto pasuri janë produkt i veprimtarisë kriminale në fushën e trafikut të lëndëve narkotike.

Kjo masë ka për qëllim parandalimin e tjetërsimit të pasurive dhe garantimin e konfiskimit të mundshëm të tyre, në rast se gjykata arrin në një vendim përfundimtar që vërteton përfshirjen në aktivitet të paligjshëm.

Organi i akuzës thekson se hetimet janë në vijim dhe se priten zhvillime të mëtejshme në lidhje me këtë çështje, përfshirë edhe identifikimin e personave të tjerë të përfshirë në rrjetin e pastrimit të parave.

“KORÇA BOOM”