Vajza humb jetën gjatë festës së diplomimit, familja ngre dyshime: S’gjetëm as rrobat, vetëm këpucët

Një ngjarje e rëndë ka tronditur qytetin e Palermos, ku 20-vjeçarja Simona Cinà, sportiste e njohur e volejbollit, ka humbur jetën në rrethana ende të paqarta gjatë një feste diplomimi në një vilë në zonën e Bagherias.

Trupi i saj u gjet pranë pishinës, e shtrirë, e mbuluar me një peshqir dhe veshur vetëm me rrobat e banjës. Vdekja e saj ka ngritur shumë pikëpyetje, sidomos për familjen, e cila kërkon zbardhje të plotë të ngjarjes.

Motra e viktimës, Roberta, ka deklaruar për mediat se Simona kishte me vete një byzylyk të nënës dhe ishte në gjendje të mirë, e vetëdijshme dhe në kontroll të plotë të vetes.

Sipas saj, sjellja e të pranishmëve dhe fakti që vila nuk u sekuestrua menjëherë, kanë ngritur dyshime mbi rrethanat e vërteta të ngjarjes.

Avokati i familjes ka kërkuar një hetim të thelluar dhe të paanshëm, duke theksuar se çdo detaj duhet ndriçuar për të kuptuar nëse vdekja ka qenë aksidentale apo ka ndodhur diçka më shumë.

Hetimet janë në vijim dhe autoritetet lokale nuk kanë dhënë ende një version zyrtar mbi shkakun e vdekjes së Simonës. Familja kërkon drejtësi.

“KORÇA BOOM”