DREJTORI SPORTIV i Skënderbeut: E kemi harruar Tiranën prej ditësh, mendojmë vetëm Teutën

Gjatë gjithë këtyre ditëve Skënderbeu është stërvitur në qytetin bregdetar të Durrësit dhe duket se pas asaj fitoreje ndaj Tiranës, gjithë stafi teknik apo edhe drejtuesit e klubit kanë kërkuar me këmbëngulje që të harrohet ajo fitore e fundit ndaj Tiranës dhe të mendohet vetëm për ndeshjen e nesërme ndaj Teutës.

Nesër, në orën 16:00 Teuta-Skënderbeu është çifti i javës së 22-të, ndërkohë që në kampin bardhekuq, duket se janë optimistë se skudra do të dalë me pikë edhe nga kjo transfertë.

Ka qenë Drejtori Sportiv i Skënderbeut, Ardi Gjançi që ka theksuar edhe për portalin "Korça Boom" se kjo ndeshje vlen shumë dhe trepikëshi që u sigurua ndaj Tiranës është harruar nga të gjithë: “Sigurisht që pas çdo ndeshjeje tjetra vjen shpejt dhe fitorja e fundit ndaj Tiranës u sfumua sapo skuadra iu kthye seancave stërvitore.

Nuk kishim më kohë të mendonim për ato që ikën. Teuta është një tjetër përballje e vështirë dhe shumë e fortë, prandaj duhej vlerësuar dhe e kemi vlerësuar maksimalisht.”

Kjo tregon se në kampin bardhekuq tashmë janë të përqëndruar te ndeshja e nesërme dhe padiskutim që vazhdimësia me rezultate pozitive është fokusi i këtij Skënderbeu.