Njihuni me Aida Nakollin, krenarinë e basketbollit…

Duket sikur është lënë në heshtje basketbolli korçar. Faktikisht jo, pasi janë figurat që na bëjnë të rikthehemi. Këtë herë do flasim për Aida Nakollin, një ikonë dhe krenari e këtij sporti. Aida e cila ka mbajtur numrin 9-të në fanelë e ka nisur basketbollin në moshë të vogël, e dalë nga klasat sportive.

Edhe pse ishte shtatshkurtër për të qenë basketbolliste, kjo nuk e ka ndalur aspak që të linte gjurmë në lojën e koshit.

Një organizatore e veçantë në llojin e vet, me një grintë të jashtëzakonshme, me një përgatitje fizike të lartë, e zgjuar, e kudo ndodhur në fushë.

Ka fituar disa tituj me ekipin e Skënderbeut, gjatë gjithë karrierës së saj e cila për hir të së vërtetës ka qenë shumë e gjatë. Dukej sikur tek Aida, nocioni kohë nuk kishte kuptim.

Ka qenë e grumbulluar me ekipin tonë Kombëtar për Lojërat Mesdhetare, është shpallur për disa vite edhe sportistja më e mirë, duke u bërë një krenari që nuk do të dalë kurrë nga memoria sportive.