Ankimi i Erion Veliajt në kushtetuese: a do të kthehet në postin e kryebashkiakut pas shkarkimit të kontestuar?

Gjykata Kushtetuese ka reaguar sot lidhur me ankimimin që ka bërë ish-kryebashkiaku i Tiranës, Erion Veliaj lidhur me vendimin e Këshillit Bashkiak dhe Qeverisë për shkarkimin e tij nga detyra.

Në një njoftim të shkurtër, Kushtetuesja bën të ditur se e ka regjistruar kërkesën.

“Gjykata ka bërë publikimin e regjistrimit të kërkesës. Shpallja është e barasvlershme me njoftimin publik,” thuhet në njoftimin e Kushtetueses.

Kjo do të thotë se kërkesa e Veliajt ka kaluar fazën e parë procedurale dhe tani do t’i nënshtrohet analizës për të vlerësuar nëse do të pranohet për shqyrtim në seancë publike.

Ish-kryebashkiaku i Tiranës kundërshton vendimin e Këshillit Bashkiak, të mbështetur edhe nga Qeveria, për shkarkimin e tij nga posti, duke pretenduar se janë shkelur procedurat dhe parimet kushtetuese në procesin e largimit.

Veliaj ka kërkuar që Gjykata Kushtetuese të shfuqizojë vendimin për shkarkimin dhe ta cilësojë atë si antikushtetues. Ai ka paralajmëruar më herët se largimi nga detyra ka qenë politik dhe i paprovuar ligjërisht.

Pas regjistrimit, Gjykata do të shqyrtojë nëse kërkesa përmbush kriteret për t’u marrë në konsideratë për seancë plenare. Më pas, nëse kalon këtë fazë, do të caktohet një relator dhe do të shpallet kalendari i shqyrtimit.

Ky është një zhvillim kyç në debatin e fundit mbi legjitimitetin e shkarkimit të një prej figurave më të njohura të administratës vendore në dekadën e fundit.

“KORÇA BOOM”