Atmosferë emocionuese në mbylljen e Kampionatit Ballkanik për vajza U19

Në përfundim të Kampionatit Ballkanik për Vajza U19, u zhvillua ceremonia zyrtare e ndarjes së çmimeve ekipore dhe individuale, ku emocionet, krenaria dhe sportiviteti mbizotëruan në çdo moment. Të gjitha skuadrat pjesëmarrëse dhuruan një garë të ndershme dhe me nivel të lartë teknik, duke dëshmuar rritjen dhe potencialin e volejbollit të femrave në rajon.

Bullgaria u shpall kampione e Ballkanit, duke zënë vendin e parë. Turqia u rendit e dyta, ndërsa Serbia zuri vendin e tretë. Më pas u renditën Rumania në vendin e katërt, Shqipëria në të pestin, Maqedonia e Veriut në vendin e gjashtë, Bosnja dhe Hercegovina në vendin e shtatë dhe Kosova në vendin e tetë.

Gjatë ceremonisë përmbyllëse u ndanë edhe çmimet individuale për lojtarët që shkëlqyen në këtë kampionat. Irmak Alpınar nga Turqia u vlerësua si pasuesja më e mirë, ndërsa Darina Naneva nga Bullgaria u shpall si bllokuese e mesit më e mirë. Kalina Naneva, gjithashtu nga Bullgaria, u nderua si sulmuesja më e mirë nga krahu dhe më vonë edhe si lojtarja më e mirë e gjithë turneut (MVP). Aylin Uysalcan nga Turqia u shpall sulmuesja më e mirë nga pozicioni i kundërt, ndërsa Nena Vujović nga Serbia mori çmimin si mbrojtësja më e mirë (libero). Çmimi për fair play iu dha volejbollistes shqiptare Klea Tare.

Medaljet për vendin e tretë u dorëzuan nga Ervis Dosti dhe Valon Nikqi. Medaljet për vendin e dytë u dorëzuan nga Ornela Belba dhe Sokol Halili, ndërsa medaljet për vendin e parë u dorëzuan nga Konalsi Gjoka dhe Dashamir Brari. Kupa për ekipin kampion iu dorëzua kapitenes së Bullgarisë, Vyara Parapunova, nga vetë presidenti i FSHV-së, Erlind Pëllumbi.

Ky kampionat ishte një sukses i plotë, jo vetëm për nga organizimi dhe niveli sportiv, por edhe për frymën e bashkëpunimit dhe respektit mes ekipeve pjesëmarrëse.

“KORÇA BOOM”