Bledi Shkëmbi: Besim dhe objektiva të mëdha, ja si po përgatitet Struga për europën

Bledi Shkembi, trajneri korçar që tashmë drejton ekipin e Strugës, është shumë i bindur dhe i motivuar për të arritur objektivat e sezonit. Ai ka dhënë një intervistë për “Korça Boom”, ku shpreh optimizmin dhe besimin e tij se skuadra është në rrugën e duhur për sukses.

“Ne do të arrijmë të realizojmë objektivin tonë. Jemi të vendosur dhe deri tani kemi qëndruar në pozicionet kryesore të renditjes, duke qenë në garë për vendin e parë në kampionat. Por njëkohësisht, nuk duhet të biem në eufori. Kampionati është i gjatë dhe kërkon edhe pak fat dhe durim nga ana jonë,” tha trajneri. “Pozicioni që kemi aktualisht na jep më shumë besim tek vetja, por duhet të jemi të kujdesshëm, sepse gara do të jetë shumë e fortë deri në fund dhe duhet të përgatitemi maksimalisht.”

Ai shtoi se objektivi kryesor i ekipit është kualifikimi në kompeticionet europiane, duke theksuar se kjo është një motivim i madh për lojtarët dhe stafin teknik. “Të martën do të luajmë edhe ndeshjen e Kupës dhe ne jemi aty për të dhënë maksimumin dhe për të realizuar objektiva maksimale, duke synuar kalimin në fazat europiane,” theksoi Shkëmbi.

Duke folur për ndeshjen miqësore ndaj Skënderbeut, trajneri shpjegoi se kjo sfidë shërbeu për të testuar lojtarë të ndryshëm nga stoli dhe për të dhënë shanse atyre që kanë pasur më pak minuta loje gjatë sezonit.

“Në këtë ndeshje aktivizova futbollistë që nuk kanë pasur shumë minuta në fushë, disa prej tyre janë rikthyer nga dëmtimet dhe disa të rinj që po kërkojnë vend në formacion. Mendoj se dhanë sinjale pozitive dhe kjo ndeshje miqësore do të na ndihmojë shumë për të përgatitur ekipin për sfidat e radhës,” u shpreh trajneri për “Korça Boom”.

“KORÇA BOOM”