Emiljano Çela para skuadrës: Ekipi është tashmë i imi, kam ardhur me dëshirën më të madhe

Trajneri i ri i Pogradecit, Emiljano Çela, ka mbajtur fjalën e tij të parë përpara lojtarëve në dhomën e zhveshjes, duke treguar qartësisht se e ka marrë drejtimin e ekipit me bindje të plotë dhe përkushtim maksimal.

“Unë, me thënë të drejtën, pata kohë të mjaftueshme për t’u menduar nëse do ta merrja këtë ekip apo jo. Nuk jam nga ata trajnerë që kur gjërat nuk shkojnë, thonë ‘nuk është ekipi im’. Jo. Koha ime ka qenë e mjaftueshme, i kam parë të gjitha ndeshjet tuaja dhe kam marrë të gjithë informacionin – si nga brenda, ashtu edhe nga jashtë,” u shpreh Çela.

Ai shtoi se vendimin për të marrë drejtimin e Pogradecit e ka marrë me dëshirën më të madhe dhe se, që nga ky moment, skuadra është zyrtarisht e tij.

“E kam marrë këtë ekip me dëshirën më të madhe. Që nga ky moment, ky është ekipi im. Nëse ne arrijmë të bëhemi të gjithë bashkë, do kemi më shumë fuqi, më shumë rezultate. Unë punën time e bazoj gjithmonë mbi respektin e ndërsjellë,” theksoi trajneri.

“KORÇA BOOM”