FSHF shpërndan pajisje për mirëmbajtjen e fushave – përfitime jo vetëm për ekipet e Superiores

Federata Shqiptare e Futbollit ka marrë një nismë të rëndësishme për përmirësimin e infrastrukturës sportive në vend, duke shpërndarë pajisje të specializuara për mirëmbajtjen e fushave të lojës. Kjo mbështetje nuk do të kufizohet vetëm për klubet e Kategorisë Superiore, por do të përfshijë edhe katër ekipe nga Kategoria e Parë.

Më konkretisht, FSHF ka vendosur të dhurojë makineri për kositjen e barit, pajisje për shpërndarjen e plehut granular, si dhe makineri për shpërndarjen e plehut të lëngshëm. Ky investim synon të rrisë cilësinë e terreneve ku zhvillohen ndeshjet, në përputhje me standardet bashkëkohore të UEFA-s dhe FIFA-s.

Këto pajisje do të ndihmojnë klubet të ruajnë një sipërfaqe loje të barabartë, të shëndetshme dhe të qëndrueshme, duke ndikuar pozitivisht në zhvillimin e ndeshjeve dhe rritjen e cilësisë së futbollit në Shqipëri.

Nisma është pjesë e strategjisë së FSHF-së për të mbështetur klubet në të gjitha nivelet dhe për të përmirësuar kushtet e trajnimit dhe garimit në mbarë vendin.

“KORÇA BOOM”