Gjiganti teknologjik “zbret” në Indi, 15 miliardë dollarë për inteligjencën artificiale

Alphabet, kompania mëmë e Google, ka njoftuar një investim prej 15 miliardë dollarësh për ndërtimin e një qendre të re të të dhënave të inteligjencës artificiale në shtetin jugor indian Andhra Pradesh.

Projekti do të vendoset në qytetin bregdetar të Visakhapatnam dhe do të jetë pjesë e rrjetit global të qendrave të të dhënave të inteligjencës artificiale të Google, i cili shtrihet në 12 vende të ndryshme.

Drejtori ekzekutiv i Google Cloud, Thomas Kurien, deklaroi se ky është investimi më i madh i kompanisë në një qendër të AI-së jashtë Shteteve të Bashkuara. Gjatë një aktiviteti në New Delhi, ai bëri të ditur se ndërtimi i objektit do të zhvillohet me faza, përgjatë pesë viteve të ardhshme.

Njoftimi vjen në një kohë kur administrata amerikane, nën drejtimin e Presidentit Donald Trump, i ka bërë thirrje kompanive teknologjike të përqendrojnë investimet brenda vendit. Megjithatë, India mbetet një prej tregjeve më tërheqëse për zhvillimin e teknologjive të reja, falë kostove të ulëta dhe një baze përdoruesish gjithnjë në rritje.

Drejtori ekzekutiv i Alphabet, Sundar Pichai, me origjinë nga India, tha se qendra e re do të sjellë teknologjitë më të avancuara të kompanisë më pranë bizneseve dhe përdoruesve indianë, duke përshpejtuar inovacionin në fushën e inteligjencës artificiale dhe duke nxitur rritjen ekonomike në të gjithë vendin.

Qeveria e shtetit të Andhra Pradesh ka deklaruar se një marrëveshje zyrtare për projektin do të nënshkruhet brenda ditës. Ministrja e teknologjisë, Nara Lokesh, e cilësoi projektin si një hap të madh drejt së ardhmes dixhitale dhe një mundësi për rritjen e profilit ndërkombëtar të shtetit.

Sipas burimeve të BBC-së, objekti do të kombinojë teknologjinë e inteligjencës artificiale dhe cloud-it me burime të energjisë së rinovueshme dhe një rrjet të avancuar të fibrave optike.

Projekti është pjesë e një plani më të gjerë të qeverisë së Andhra Pradesh për të zhvilluar 6 gigavat kapacitet energjie për qendrat e të dhënave deri në vitin 2029, duke e pozicionuar rajonin si një destinacion kryesor për gjigantët teknologjikë globalë.

Qendrat e të dhënave janë objekte fizike që strehojnë pajisje kompjuterike dhe rrjetëzimi, të nevojshme për ruajtjen, përpunimin dhe shpërndarjen e të dhënave. Ato përfshijnë serverë, sisteme ruajtjeje, pajisje rrjeti dhe sisteme mbështetëse për energji dhe ftohje.

“KORÇA BOOM”