Gjykimi ndez polemikat te Devolli: Drejtuesit flasin për padrejtësi flagrante, trajneri Maneshi merr përgjegjësitë dhe kërkon kthesë urgjente

Pas humbjes së pësuar në transfertën ndaj Delvinës, atmosfera në klubin e Devollit është përshkuar nga analiza të ashpra dhe akuza të drejtpërdrejta ndaj arbitrimit. Sipas drejtuesve të klubit, humbja nuk erdhi si pasojë e lojës së dobët, por nga ndikimi i faktorëve të jashtëm – kryesisht vendimet e gjyqtarit të takimit.

Ekzekutivi i klubit, Ermir Lukra, ka qenë mjaft i drejtpërdrejtë në deklaratën e tij pas ndeshjes, duke thënë:

“Do të thosha se me gjykime të tilla dëmtohet futbolli. Është e papranueshme për ne që një gjyqtar i tillë nuk ishte në gjendje të menaxhonte lojën dhe me vendimet e tij na ka ndëshkuar rëndë. Mjafton të kujtojmë se penalltia e dhënë kundër nesh nuk ishte, goli i tretë i shënuar nga Delvina nuk kaloi vijën fatale, ndërsa në pjesën e dytë është luajtur futboll jo më shumë se 7 minuta – pjesa tjetër ishte me ndërprerje të vazhdueshme nga lojtarët kundërshtarë që vetëm shtriheshin në fushë.”

Ai shton gjithashtu një shembull konkret për të ilustruar kohën e humbur:

“Hyrja dhe dalja e mjekut nga fusha zgjaste mbi pesë minuta.”

Megjithatë, pavarësisht pakënaqësive ndaj arbitrimit, drejtuesit e Devollit nuk janë kursyer as vetëkritikën për lojën e ekipit. Sipas tyre, fitorja duhej siguruar më herët dhe pa e lejuar ndeshjen të komplikonte.

Në të njëjtën linjë është shprehur edhe trajneri Erlind Maneshi, i cili ka mbajtur një qëndrim kritik si ndaj vetes, ashtu edhe ndaj lojtarëve. Në analizën me skuadrën, Maneshi ka marrë përsipër përgjegjësinë, por ka kërkuar gjithashtu reflektim të menjëhershëm nga futbollistët në ndeshjen e radhës.

Burime pranë klubit bëjnë të ditur se klima në skuadër mbetet e motivuar, pavarësisht humbjes, dhe ekziston besimi i plotë se Devolli ka cilësinë dhe forcat për të reaguar menjëherë.

“KORÇA BOOM”