Ja si paraqitet gjendja e Kombëtares shqiptare përpara ndeshjes vendimtare me Serbinë

Kombëtarja shqiptare do të luajë të shtunën shansin e saj më të rëndësishëm në kualifikueset e Kupës së Botës 2026, në një përballje të zjarrtë ndaj Serbisë, e cila do të zhvillohet në qytetin e Leskovacit.

Kuqezinjtë renditen aktualisht në vendin e dytë të grupit K me 8 pikë pas 5 ndeshjesh, ndërsa Serbia ndodhet në vend të tretë me 7 pikë, por me një ndeshje më pak. Ky duel shihet si vendimtar për të dyja kombëtaret në garën për vendin e dytë, që garanton një mundësi reale për të siguruar pjesëmarrjen në Botërorin e ardhshëm.

Llogaritë e grupit janë të ndërlikuara, por një fitore e Shqipërisë në Leskovac do të ishte një hap madhor drejt kualifikimit. Pas kësaj ndeshjeje, kuqezinjtë do të përballen me Andorrën dhe më pas me Anglinë në sfidën e fundit, e cila mund të ketë më shumë vlerë statistikore, nëse rezultatet shkojnë në favor të ekipit të Sylvinhos.

Në anën tjetër, Serbia ka ende për të luajtur ndaj Andorrës, Letonisë dhe Anglisë, çka i jep asaj gjithashtu mundësi për të rikuperuar. Një fitore serbe të shtunën do të zhbënte shumë nga përpjekjet e deritanishme të Shqipërisë dhe do ta vështirësonte ndjeshëm rrugën drejt Botërorit. Në atë rast, kuqezinjtë do të duhej të fitonin ndeshjet e mbetura dhe të shpresonin në ndonjë gabim të Serbisë.

Sa i përket golavarazhit, Shqipëria qëndron më mirë, me një bilanc pozitiv: 5 gola të shënuar dhe 3 të pësuar. Serbia, në krahasim, ka një diferencë negative – 4 gola të shënuar dhe 5 të pësuar – shumica prej të cilëve në humbjen 0-5 ndaj Anglisë. Në tre ndeshjet e tjera, Serbia nuk ka pësuar asnjë gol, çka dëshmon për një mbrojtje solide, përtej humbjes me anglezët.

Anglia tashmë e ka blinduar praktikisht vendin e parë në grup dhe i duhet vetëm një fitore për të siguruar matematikisht kalimin në Botëror. Ndeshja e saj me Shqipërinë do të luhet në nëntor dhe mund të mos ketë peshën që pritej, nëse kuqezinjtë arrijnë të marrin maksimumin në dy përballjet e ardhshme.

"KORÇA BOOM"