Ndeshja kualifikuese mes Serbisë dhe Shqipërisë zhvillohet me masa të jashtëzakonshme, sigurie për të shmangur përsëritjen e incidenteve të dhunshme

Kur këtë të shtunë përballen ekipet kombëtare të Serbisë dhe Shqipërisë në një ndeshje kualifikuese për Botërorin, stadiumi i vogël me kapacitet prej vetëm 8100 spektatorësh në Leskovac do të jetë nën një kontroll të jashtëzakonshëm sigurie. Qindra policë, përfshirë snajperë, oficerë civilë dhe ekspertë për dronë, do të jenë në gatishmëri për të siguruar një mjedis të qetë dhe të sigurt gjatë takimit.

Kjo ndeshje është e veçantë jo vetëm për rëndësinë sportive, por edhe për historikun e tensionuar mes dy vendeve, që refletohet edhe tek tifozët dhe incidentet e mëparshme. Sektori për tifozët shqiptarë do të mungojë plotësisht, pasi biletat nuk u vunë në shitje të lirë, me qëllim shmangien e skandaleve të përsëritura, si ajo e vitit 2014.

Në atë kohë, ndeshja mes Serbisë dhe Shqipërisë në kuadër të kualifikueseve për Kampionatin Europian u shoqërua me tensione të mëdha. Para fillimit të ndeshjes, tifozë serbë hodhën gurë ndaj autobusit të skuadrës shqiptare, ndërsa himni kombëtar shqiptar u fishkëllua gjatë gjithë kohës. Momenti më i përfolur ishte kur një dron me flamurin e “Shqipërisë së Madhe” fluturoi mbi fushë, duke ndezur përleshje të dhunshme midis lojtarëve dhe tifozëve.

Pas ndërprerjes së asaj ndeshjeje, tensionet nuk u shuan. Në Kosovë, qindra tifozë festuan me karvanë makinash dhe fishekzjarre, ndërsa në zonat kufitare u dogjën flamujt e të dyja vendeve. Përplasjet midis komuniteteve serbe dhe shqiptare u shtrinë edhe në diasporë, duke krijuar një atmosferë të tensionuar që ndikoi edhe në marrëdhëniet diplomatike, me shtyrjen e vizitës së kryeministrit shqiptar në Beograd.

Ky konflikt ka rrënjë shumë më të thella, që lidhen me statusin e Kosovës. Megjithëse Kosova shpalli pavarësinë në vitin 2008, Serbia nuk e njeh atë dhe kjo është një nga çështjet më të ndjeshme midis dy vendeve. Në këtë kuadër, tifozët serbë shprehin nacionalizmin e tyre me simbole si flamuri i “Serbisë së Madhe” dhe legjenda e kalorësit Milosh Obiliç, duke u konsideruar mbrojtës të kulturës dhe fesë ortodokse në rajon.

Në anën tjetër, tifozët shqiptarë, shpesh të lidhur me historinë dhe luftën e Ushtrisë Çlirimtare të Kosovës, e shohin kombësinë si një unitet që përfshin edhe shqiptarët në vendet fqinje.

Kjo përplasje identitetesh dhe historish reflektohet edhe në fushën e futbollit, ku mesazhe politike dhe kombëtare janë të pranishme në çdo ndeshje.

Një rast i fundit ishte në Kampionatin Europian 2024 në Hamburg, ku lojtari shqiptar Mirlind Daku u pezullua për dy ndeshje pasi iu drejtua tifozëve serbë me fjalë ofenduese. Nga ana tjetër, Federata Serbe u gjobit për përpjekjet e tifozëve për të djegur flamurin shqiptar gjatë një ndeshjeje kundër Zvicrës.

Kjo ndeshje mes Serbisë dhe Shqipërisë nuk është thjesht një përballje sportive, por një reflektim i tensioneve të thella historike dhe politike që përshkojnë rajonin dhe ndikojnë në marrëdhëniet mes dy vendeve dhe komuniteteve të tyre.

“KORÇA BOOM”