Pa trajner, me shumë pikëpyetje, Kukësi zbret në fushën e Skënderbeut me drejtim të përkohshëm

Klubi i Kukësit ka vendosur të mos nxitojë me emërimin e trajnerit të ri, pas largimit të Bledar Pajazitit. Vendimi për pasuesin e tij pritet të merret pas ndeshjes ndaj Skënderbeut, e cila përkon me një ndalesë në kalendar për shkak të angazhimeve të ekipeve kombëtare.

Deri atëherë, skuadra do të drejtohet nga drejtori sportiv Asuel Dervishaj, i cili ka marrë përsipër stërvitjen dhe përgatitjen e ekipit për sfidën e vështirë që i pret këtë fundjavë në Korçë.

Në një periudhë tranzicioni, verilindorët po përballen edhe me probleme në aspektin fizik. Mungesa më e ndjeshme për momentin është ajo e mbrojtësit brazilian, Xhekson Ferreira, i cili gjatë kësaj jave është stërvitur i diferencuar dhe mbetet në dyshim për ndeshjen ndaj Skënderbeut.

Një rezultat pozitiv në Korçë, qoftë edhe një barazim, do të shërbente si një frymëmarrje për ekipin, duke stabilizuar atmosferën dhe lehtësuar presionin para vendimit për trajnerin e ri.

Emri më i përfolur për të marrë drejtimin e Kukësit është Emiljano Çela, i cili është një njohës i mirë i ambientit dhe ka më parë një eksperiencë në pankinën kuksiane. Rikthimi i tij shihet si një zgjidhje e qëndrueshme për të vazhduar sezonin me objektiva të qartë.

“KORÇA BOOM”