Përballë një gjiganti: Vllaznia nuk ia del në Milano, por lufta vazhdon

Skuadra e vajzave të Vllaznisë është mundur me rezultatin 7-0 nga Interi në ndeshjen e parë të fazës finale të kualifikueseve për Europa Cup. Takimi u zhvillua në Milano, ku ekipi italian dominoi që në minutat e para të lojës.

Vajzat zikaltër siguruan praktikisht kualifikimin që në pjesën e parë, duke shënuar katër gola. Rezultati u hap nga një autogol i Bajraktarit, më pas Wullaert realizoi dy herë dhe Detruyer shtoi edhe një tjetër gol, duke vulosur shifrat në 4-0 përpara pushimit të ndeshjes.

Në pjesën e dytë, Interi vijoi me të njëjtin ritëm, duke shtuar edhe tre gola të tjerë në portën e Vllaznisë. Bugeja gjeti rrugën e rrjetës, ndërsa Polli realizoi një dopietë, duke e çuar rezultatin përfundimtar në 7-0.

Sfida e kthimit do të zhvillohet më 15 tetor në stadiumin “Loro Boriçi” në Shkodër, duke nisur nga ora 18:00. Vllaznia do të kërkojë të paraqitet denjësisht përballë një rivali të këtij niveli, pavarësisht disavantazhit të madh nga ndeshja e parë.

"KORÇA BOOM"