Revolucion në futbollin shqiptar! Vjen vendimi që ndryshon kampionatin

Federata Shqiptare e Futbollit ka miratuar një rregull të ri që synon t'u japë më shumë hapësirë futbollistëve të rinj në kampionatet kombëtare. Vendimi është marrë nga Komiteti Ekzekutiv i FSHF-së dhe do të zbatohet duke nisur nga sezoni sportiv 2026–2027.

Sipas FSHF-së, kjo masë është pjesë e strategjisë për zhvillimin e futbollit shqiptar, rritjen e konkurrencës mes lojtarëve vendas dhe krijimin e një baze më të fortë për ekipet kombëtare në vitet e ardhshme.

Rregullorja e re parashikon që në Abissnet Superiore dhe në Kupën e Shqipërisë, çdo skuadër do të jetë e detyruar të aktivizojë nga minuta e parë të paktën një futbollist me datëlindje 2007 ose më të ri, i pajisur me pasaportë shqiptare. Ky lojtar duhet të qëndrojë në fushë të paktën për një pjesë loje.

Ndërkohë, në Kategorinë e Parë, Kategorinë e Dytë dhe Kategorinë e Tretë, detyrimi është edhe më i madh. Klubet duhet të nisin ndeshjen me një futbollist të datëlindjes 2007 e në vijim, me pasaportë shqiptare, i cili duhet të luajë gjatë gjithë takimit, përveç rasteve të veçanta të parashikuara në rregullore.

Gjithashtu, nëse lojtari i ri zëvendësohet gjatë ndeshjes, ai duhet të zëvendësohet me një tjetër futbollist që plotëson të njëjtat kritere të moshës dhe shtetësisë. Në rast se skuadra nuk ka një lojtar të tillë në dispozicion, ajo do të detyrohet të vazhdojë ndeshjen me një futbollist më pak për periudhën gjatë së cilës zbatohet ky detyrim.

Me këtë vendim, FSHF synon të nxisë zhvillimin e talenteve shqiptare, t'u japë më shumë minuta lojtarëve të rinj dhe të krijojë një model të qëndrueshëm për rritjen e cilësisë së futbollit vendas në dekadën e ardhshme.

“KORÇA BOOM”