Skënderbeu, i kompletuar në sulm?! – Merkatoja mund të trazojë gjithçka

Në pamje të parë, skuadra korçare duket se nuk ka shqetësime në repartin ofensiv. Trajneri Gjoka mund të jetë i qetë për momentin, pasi ka në dispozicion të njëjtët tre sulmues nga sezoni i kaluar, të cilët e njohin mirë ambientin, stilin e lojës dhe kërkesat e stafit teknik.

Si të mos mjaftonte kjo, së fundmi është shtuar edhe një emër i njohur për tifozët: Baba Musta, një rikthim që e forcon më tej ofensivën dhe sjell eksperiencë e cilësi.

Në këtë fazë përgatitore, sulmi mund të konsiderohet i kompletuar. Katër emra me eksperiencë dhe karakteristika të ndryshme i japin trajnerit opsione të shumta për të ndërtuar skema fleksibile në vijën e parë të fushës.

Por situata nuk është aq statike sa duket. Në prapaskenë, merkatoja mbetet e hapur dhe disa prej këtyre emrave mund të jenë pjesë e diskutimeve për një dalje të mundshme. Lëvizje të tilla do të ndryshonin menjëherë panoramën në sulm dhe do ta detyronin klubin të hyjë në merkato për të zëvendësuar ndonjë nga titullarët e sezonit të kaluar.

Ky është një skenar që stafi teknik e ka në konsideratë, ndaj edhe pavarësisht qetësisë momentale, askush nuk e konsideron repartin ofensiv si të mbyllur përfundimisht. Çdo dalje do të kërkojë reagim të menjëhershëm, dhe për këtë arsye drejtuesit kanë nisur të ndjekin alternativa që mund të aktivizohen në rast të një largimi.

Nëse gjithçka mbetet siç është, atëherë sulmi i korçarëve hyn në sezonin e ri me një bazë të konsoliduar. Por nëse hapet një derë për dalje, pritet të hapet menjëherë edhe një tjetër për një hyrje të re.

“KORÇA BOOM”