Skënderbeu në volejboll për femra synon majat: Haxhillari tregon objektivat dhe premton luftë për titull

Skuadra e volejbollit për femra e Skënderbeut ka bërë të qarta objektivat për sezonin e ri. Konfirmimi i trajnerit Olsi Haxhillari në krye të pankinës shënon vazhdimësinë e projektit sportiv, ndërsa ambiciet këtë herë janë të larta, një vend në katërshen e parë, me sytë nga titulli kampion.

“Do të ketë rivalitet, pasi të gjitha ekipet janë përforcuar, por ne nuk i trembemi askujt,” u shpreh Haxhillari. “Do të punojmë fort dhe vetëm përmes punës do të arrijmë rezultatet. Kjo është rruga jonë.”

Ai shtoi se shumë shpejt priten edhe afrime të reja në ekip: “Brenda këtyre dy javëve do të konkretizohen lëvizjet në merkato. Jemi në kontakte me lojtare që do të na ndihmojnë të arrijmë objektivat që kemi vendosur.”

Skënderbeu pritet të hyjë në sezonin e ri me ambicie të qarta dhe një grup të konsoliduar, duke synuar të rikthehet si një nga skuadrat më konkurruese në kampionat.

Përveç analizës teknike, trajneri i Skënderbeut kishte edhe një mesazh të veçantë për tifozët:

“Unë i ftoj të jenë përsëri në mbështetje të ekipit. Jemi një grup i ri dhe kemi nevojë për sportdashësit. U premtoj që nuk do t’i zhgënjejmë.”

Skënderbeu është në fazën përgatitore, dhe me një projekt të qartë dhe synime të guximshme, pritet të jetë një nga ekipet për t’u ndjekur në sezonin e ri të volejbollit për femra.

“KORÇA BOOM”