Struga triumfon ndaj Skënderbeut në një ndeshje me ritëm të lartë dhe momente emocionuese, ndërsa korçarët barazuan përkohësisht por nuk mundën të shmangin humbjen

Skënderbeu nuk arriti të dalë me fitore nga ndeshja miqësore që zhvilloi në Korçë kundër Strugës, duke pësuar humbje me rezultatin 2-1 në favor të mysafirëve nga Maqedonia e Veriut. Struganët treguan një lojë të mirë dhe shënuan dy gola gjatë ndeshjes, ndërsa korçarët arritën vetëm të barazonin përkohësisht rezultatin.

Të parët që kaluan në avantazh ishin miqtë nga Struga, të cilët realizuan golin e parë në minutën e 6-të pas një aksioni të organizuar mirë, ku Radeski shfrytëzoi një goditje diagonale për të mposhtur portierin kundërshtar. Korçarët nuk u dorëzuan dhe reaguan shpejt, duke arritur të barazojnë në minutën e 18-të përmes një goli të bukur të Nasrit, i cili ekzekutoi një goditje nga jashtë zone që surprizoi mbrojtjen kundërshtare dhe portierin.

Pjesa e parë e takimit ishte mjaft e shpejtë dhe me shumë raste nga të dyja skuadrat, ndërsa në pjesën e dytë ritmi u ul dukshëm, pjesërisht edhe për shkak të zëvendësimeve të shumta nga të dy trajnerët, që synonin t’i jepnin minutazhin e duhur lojtarëve rezervë.

Momenti vendimtar i ndeshjes erdhi në minutën e 73-të, kur Sevtoski nga Struga goditi fuqishëm nga jashtë zone, duke tundur rrjetën e korçarëve dhe duke dhënë avantazhin e dytë për ekipin e tij. Ky gol i shënuar në një moment kyç të takimit u tregua vendimtar për fatin e ndeshjes, pasi Skënderbeu nuk arriti të reagojë më për të shmangur humbjen.

Në përgjithësi, ndeshja shërbeu si një test i mirë për të dy ekipet, të cilat treguan një lojë korrekte dhe një organizim të mirë në fushë. Të dy skuadrat po udhëheqin me sukses në kampionatet e tyre përkatëse – Struga në elitën e futbollit maqedonas dhe Skënderbeu në kategorinë e parë shqiptare – duke treguar se janë ekipe serioze dhe me ambicie.

“KORÇA BOOM”