Udhëtim 49-minutësh drejt Nishit, Kombëtarja gati për Serbi-Shqipëri

Kombëtarja shqiptare ka mbërritur në Serbi në kuadër të sfidës kualifikuese për Kupën e Botës 2026. Kuqezinjtë kanë zbritur në aeroportin e Nishit pak minuta më parë, pas një fluturimi prej 49 minutash nga aeroporti “Nënë Tereza” në Tiranë.

Sapo kanë mbërritur, lojtarët dhe stafi teknik janë nisur menjëherë drejt hotelit në qytetin e Nishit, ku do të qëndrojnë gjatë qëndrimit në Serbi. Pritja në aeroport është bërë nën masa të rrepta sigurie, duke reflektuar ndjeshmërinë e kësaj sfide.

Pasditen e sotme, ekipi do të udhëtojë drejt qytetit të Leskovacit, ku trajneri Sylvinho dhe kapiteni i Kombëtares do të mbajnë konferencën zyrtare për shtyp para ndeshjes. Më pas, skuadra do të zhvillojë edhe seancën e fundit stërvitore në stadiumin “Dubocica”, ku do të luhet dhe përballja.

Me Kombëtaren kanë udhëtuar gjithashtu edhe zyrtarë të Federatës Shqiptare të Futbollit, si dhe disa përfaqësues të mediave shqiptare.

Ndeshja ndaj Serbisë do të luhet nesër, më 11 tetor, në orën 20:45, në stadiumin e Leskovacit. Ky takim është pjesë e fazës kualifikuese në grupin K për Kupën e Botës “USA-Kanada-Meksikë 2026” dhe konsiderohet një nga sfidat më të forta dhe delikate për kuqezinjtë.

"KORÇA BOOM"