Aksident i rëndë në Vloçisht, tre persona plagosen dhe dërgohen në spital

Një aksident i rëndë, ku kanë mbetur tre persona të plagosur, ka ndodhur mesditën e kësaj të premte në aksin rrugor Maliq–Korçë.

Ngjarja ka ndodhur në degëzimin e fshatit Vloçisht dhe dyshohet se shkak është bërë një parakalim i gabuar nga drejtuesi i një mjeti që po udhëtonte nga Maliqi në drejtim të Korçës.

Si pasojë e këtij manovrimi, mjeti është përplasur me një automjet tjetër që lëvizte nga Korça drejt Maliqit.

Në mjetin që udhëtonte drejt Maliqit ndodhej një çift bashkëshortësh, të cilët kanë mbetur të plagosur rëndë, por jashtë rrezikut për jetën. I plagosur rëndë ka mbetur edhe drejtuesi i mjetit që dyshohet se shkaktoi aksidentin.

Të tre të plagosurit janë transportuar në spitalin e Korçës dhe ndodhen nën kujdesin e mjekëve.

Policia ndodhet në vendngjarje dhe po heton për shkaqet e aksidentit, ndërsa janë sekuestruar edhe pamjet e kamerave të sigurisë nga disa biznese pranë vendit ku ndodhi përplasja.

Njoftimi i policisë

“Në aksin rrugor “Korçë-Pogradec”, në afërsi të fshatit Vloçisht, Maliq, automjeti me drejtues shtetasin R. D., është përplasur me automjetin me drejtues shtetasin G. T. Si pasojë e përplasjes janë lënduar drejtuesi R. D., dhe shtetasja M. T., rreth 40 vjeçe, pasagjere në automjetin me drejtues shtetasin G. T., të cilët ndodhen për mjekim në spital, jashtë rrezikut për jetën. Grupi hetimor po punon për përcaktimin e shkaqeve të aksidentit”, thuhet në njoftim.

“KORÇA BOOM”