Barazim i hidhur për Pogradecin, Çela: E meritonim fitoren, por gjyqtari na ndëshkoi

Pas barazimit 1-1 në transfertë ndaj Besës, trajneri i Pogradecit, Emiljano Çela, u shfaq i pakënaqur me vendimet arbitrare, duke theksuar se skuadrës së tij iu mohua një penallti që mund t’i jepte fitoren.

Në deklaratën pas ndeshjes, Çela u shpreh i kënaqur me angazhimin dhe sakrificën e lojtarëve, duke nënvizuar se kishin pasur mungesa të shumta dhe se disa prej futbollistëve kishin luajtur jashtë pozicioneve të tyre natyrale.

"Jam i kënaqur me paraqitjen e skuadrës. Të gjithë lojtarët arritën limitet e tyre. Kishim shumë mungesa, në pankinë ishin djem të rinj. Edhe pse janë cilësorë dhe të talentuar, nuk ishte ndeshja e tyre sot, sepse kishte një dozë të lartë emocionale," tha Çela.

Ai foli edhe për ndryshimet taktike të bëra gjatë javës në përpjekje për të ribërë ekipin: "Kemi punuar për të riorganizuar skuadrën. Disa lojtarë luajtën jashtë rolit të tyre, si Kasmollari si numër 6 apo Ezekiel në krahun e majtë. Jam krenar për sakrificën që bënë, veçanërisht Lila dhe Zguro."

Megjithatë, pika kulmore e reagimit të trajnerit ishte penalizimi që, sipas tij, i bëri arbitri skuadrës së Pogradecit.

"Është penallti e pastër, që do na kishte dhënë fitoren. Habitem pse gjyqtari nuk e dha. Luanin dy prej ekipeve më të mira të Kategorisë së Parë dhe nuk kishte VAR. Ishte vendim i gabuar që na privoi nga tre pikët," theksoi trajneri, duke e quajtur veten të "vjedhur" nga vendimet e arbitrave.

“KORÇA BOOM”