Bashkia Pustec/ Vizitë e përfaqësuesve francezë për zhvillimin e turizmit në rajon

Kryetari i Bashkisë Pustec, z. Pali Kolefski, së bashku me aktorë lokalë në fushën e turizmit, pritën përfaqësues të organizatës TETRACTYS dhe Gjeomjedis, të mbështetur nga Ambasada Franceze, në kuadër të një nisme për njohjen e potencialeve turistike në rajonin juglindor të vendit.

Kjo vizitë vjen me synimin që Prespa të përfshihet në guidat turistike, duke ndihmuar në rritjen e numrit të vizitorëve dhe promovimin ndërkombëtar të zonës.

Gjatë qëndrimit në Pustec, përfaqësuesit u njohën me atraksionet e shumta të rajonit – si ato të njohura, ashtu edhe destinacionet ende të paeksploruara – dhe shprehën gatishmërinë për bashkëpunime të reja dhe projekte të përbashkëta në të ardhmen.

Kryetari Pali Kolefski theksoi gatishmërinë e Bashkisë Pustec për çdo bashkëpunim që synon zhvillimin e turizmit, forcimin e ekonomisë lokale dhe përmirësimin e mirëqenies së komunitetit.

“KORÇA BOOM”