Bylis humb në fund, Vllaznia fiton me autogol dhe dramë në Ballsh

Ndeshja mes Bylisit dhe Vllaznisë, e vlefshme për javën e shtatë të Kategorisë Superiore, përfundoi me fitoren minimale të kuqebluve në Ballsh me rezultatin 0-1. Një përballje me shumë tension, vendime të VAR-it, emocione dhe dramë deri në sekondat e fundit.

Sfida nisi me ritëm që në minutën e parë, kur Yago realizoi për Vllazninë, por goli u anulua për pozicion jashtë loje pas verifikimit me sistemin VAR.

Pjesa e parë u mbyll pa gola, ndërsa në të dytën pati zhvillime të shumta. Në minutën e 62-të, arbitri Enea Vrapi akordoi një penallti për Vllazninë, por me ndihmën e VAR-it vendimi u anulua.

Goli i vetëm i takimit erdhi në minutën e 83-të, kur një autogol i Peraltës i dha avantazhin skuadrës shkodrane.

Në minutën e 90+7, Bylisi barazoi përkohësisht me golin e shënuar nga Abdullai, por edhe ky gol u anulua nga VAR për pozicion jashtë loje.

Ndeshja u mbyll me fitoren 0-1 të Vllaznisë, që largohet nga Ballshi me tre pikë të rëndësishme në xhep.

“KORÇA BOOM”