Daja dhe Tetova përballen si trajnerë, përballja me shumë ndryshime taktike dhe batuta pas ndeshjes

Ndeshja mes Partizanit dhe Egnatias u mbyll me një barazim pa gola, por pas ndeshjes, trajnerët Ilir Daja dhe Edlir Tetova ndanë analizat e tyre taktike me respekt dhe batuta mes tyre.

Ilir Daja theksoi se loja u karakterizua nga shumë ndryshime të brendshme dhe tentativa për të gjetur zgjidhje taktike në fushë. Ai u shpreh:

“Të jemi pak më të rezervuar, meqë erdhi dhe Tetova. Edhe Egnatia, pra kolegu, pavarësisht se e kam pasur futbollistin tim, ndryshoi. U përgjigjëm edhe ne me ndryshim. Nuk ndryshuan vendosje, por lojtarë që kërkuan ta nxjerrin topin nga poshtë lart. Në një pjesë tjetër loje kaloi prapë në një vendosje tjetër, që ne duhet t’i përgjigjeshim.

Të gjithë këto ndryshime prishën pak ekuilibrat e ekipeve në fushë. Dhe ne dhe Egnatia në disa raste morëm kundërsulme nga njëri-tjetri. I dha bukuri lojës sepse ekipet u bënë me disa shkallëzime. Kur ka kaq shumë shkallëzime, ka edhe më shumë alternativa për të sulmuar.”

Nga ana tjetër, Edlir Tetova pranoi që në disa momente Egnatia u detyrua të tërhiqej më shumë seç ishte parashikuar, por në fund arriti të marrë kontrollin në pjesë të dytë përmes ndërrimeve taktike.

“Pjesërisht do jem dakord, do i jap pak meritat te kjo pjesë. Për pjesën e dytë flasim, te 17-20 minutat. Mendoj që ishin këto më shumë superiorë. Na detyroi të zbrisnim më poshtë se duhet, te 2/3 siç e kishim përgatitur. Me ndryshimin e sistemit, e ndryshova dy herë në pjesën e dytë, morëm minutazhin tonë. Siç e tha profesori, nga të dyja anët kishte tranzicione dhe mendoj që ishte lojë shumë e bukur.”

Në fund, batutat nuk munguan. Tetova u shpreh me buzëqeshje:

“Besoj unë e njihja më mirë, të paktën nga ana praktike. Unë kam qenë nxënësi.”

Ndeshja përfundoi me përqafim mes dy trajnerëve, në një shfaqje respekti dhe rivaliteti të shëndetshëm në fushën e lojës.

“KORÇA BOOM”