Gjoka pas fitores në Gjirokastër: Fitore që erdhi nga besimi, forca fizike dhe cilësia individuale

Pas triumfit të rëndësishëm në transfertë ndaj Luftëtarit, trajneri i Skënderbeut, Ernest Gjoka, ka vlerësuar paraqitjen e skuadrës së tij, duke theksuar se fitorja erdhi si rezultat i organizimit, përgatitjes fizike dhe besimit deri në fund.

“Kundërshtari ishte një ekip shumë i mirë, me një filozofi loje të qartë. Ne fituam falë tranzicionit të shpejtë dhe gjendjes më të mirë fizike që treguam deri në minutat e fundit të takimit. Besuam te goli dhe ai erdhi falë aftësive të Tajos,” u shpreh Gjoka pas ndeshjes.

Tekniku korçar shtoi se është i kënaqur me tre pikët, duke nënvizuar rëndësinë që ka menaxhimi i momenteve vendimtare në ndeshje. Jo rastësisht, Skënderbeu këtë sezon ka treguar aftësinë për të zgjidhur sfida edhe në minutat e fundit, një tregues i pjekurisë së ekipit dhe përvojës që po shfaq ndeshje pas ndeshjeje.

“KORÇA BOOM”