“Kjo nuk është më futboll!” – Presidenti i Bylisit shpërthen pas humbjes me Vllazninë: "Jemi lodhur nga skenarët e vjetër"

Pas humbjes 0-1 në shtëpi ndaj Vllaznisë, presidenti i Bylisit, Besnik Kapllanaj, ka reaguar ashpër në emisionin pas ndeshjes, duke akuzuar në mënyrë të drejtpërdrejtë sistemin e arbitrimit dhe duke lëshuar deklarata të forta ndaj drejtuesve të sektorit të arbitrave në FSHF.

“Nuk është hera e parë. Më duket sikur po i kthehemi skenarëve të vjetër, si para dy vitesh me Vllazninë. Edhe atëherë në VAR ishte Beqiri dhe vëzhgues Kridens Meta. Po të njëjtët emra, të njëjtat histori,” – tha Kapllanaj.

Ai theksoi se e gjithë situata i ngjan një loje të komanduar nga kreu i arbitrave në FSHF, Sokol Jareci .“E kam thënë edhe më parë, dhuna nuk vjen nga presidentët e klubeve, por nga njerëz si Jareci, Beqiri, Kridens Meta. Arbitrat si Andi Koçi i bëjnë keq kampionatit. Kridens Meta nuk duhet të jetë më pjesë e Federatës,” – u shpreh ai.

Kapllanaj kritikoi ashpër edhe VAR-in për episodet e diskutueshme në ndeshje:“Na u hoq një penallti, na u anulua një gol. Kjo është dhunë! VAR-i ishte sot thjesht një kukull, nuk dinte çfarë të bënte.”

I pyetur nëse klubi do të ndërmarrë hapa zyrtarë, presidenti i Bylisit la të kuptohej se situata është bërë e padurueshme për të:“Për çfarë hapash zyrtarë po flasim? Edhe te penalltia kundër Flamurtarit nuk thamë gjë. Por nëse jemi Ballshi dhe na shohin si të vegjël, le të na thonë troç që nuk e kemi vendin në Superiore. Të shkrijmë ekipin, të shkojmë në Kategorinë e Dytë dhe mbyllet ky muhabet.”

Në fund, ai përmendi edhe një detaj që hodhi më shumë dyshime mbi drejtësinë e arbitrimit:“U bëra pishman që nuk i thashë skuadrës të mos vazhdonte ndeshjen pas golit të anuluar. Të lejonim Vllazninë të shënonte dhe të mbyllnim gjithçka.”

Ndërkohë, trajneri i Bylisit, Mirel Josa, deklaroi më herët se nuk i takon atij të komentojë episodet e arbitrimit, por e quajti ndeshjen si një përballje me dy fytyra për skuadrën e tij.

“KORÇA BOOM”