Luftëtari pa frikë: Skënderbeu nuk është i pathyeshëm!

Sulmuesi i Luftëtarit, Ziaj, ka folur për mediat para sfidës ndaj Skënderbeut, duke treguar qartë vendosmërinë dhe besimin që ka skuadra e tij. Përballja me një kundërshtar të fortë nuk i tremb gjirokastritët, të cilët, sipas Ziajt, janë të përgatitur maksimalisht për të kërkuar fitoren.

Sipas tij, përballë do të jetë një ekip që ka bërë shumë mirë deri tani, me objektiva të qarta për ngjitje në Superiore dhe që nuk ka pësuar asnjë humbje. Megjithatë, kjo nuk i zbeh aspak motivimin dhe dëshirën e Luftëtarit për të marrë maksimumin nga kjo sfidë.

“Tani jemi plotësisht të përgatitur për Skënderbeun,” u shpreh Ziaj, duke shtuar se skuadra ka punuar fort gjatë gjithë javës për të qenë gati në çdo aspekt, qoftë fizikisht, qoftë nga ana taktike. Ai pranoi forcën e kundërshtarit, por theksoi se Luftëtari nuk ka frikë nga askush dhe do të hyjë në fushë vetëm me një synim – të marrë tre pikët.

“Luajmë kundër një skuadre shumë të fortë, që pretendon për ngjitje dhe ka treguar formë të mirë në çdo ndeshje. Megjithatë, si gjithmonë, ne do të hyjmë në fushë për të fituar. Kemi besim te forcat tona dhe mendojmë se, nëse japim më të mirën, mund t’ia dalim,” tha ndër të tjera ai.

Sfida me Skënderbeun pritet të jetë një test i vështirë, por Ziaj shprehu bindjen se Luftëtari do të tregojë karakter dhe do të luftojë deri në fund për një rezultat pozitiv. Atmosfera në grup është pozitive dhe të gjithë lojtarët janë të motivuar për të dhënë maksimumin.

“KORÇA BOOM”