NGA Ledina Alolli/ Fshati shqiptar vetëm po shkatërrohet, politikë e qëllimshme e kryeministrit Edi Rama

Fshati shqiptar vetëm po shkatërrohet dhe kjo nuk ndodh rastësisht. Është një politikë e qëllimshme e kryeministrit Edi Rama.

Kujtojmë se çdo ditë qeveria godet bujqësinë, duke e bërë jetesën në fshat gjithnjë e më të pamundur. Vendimi për heqjen e TVSH-së 20% në autofaturim, qëndron si një nga aktet më të padrejta. Prej tij fermerët u zhveshën nga çdo mbrojtje ekonomike dhe u lanë të pambrojtur përballë tregut të shitjeve.

Si rrjedhojë, pasojat janë të dukshme. Sot tregtarët nuk blejnë më prodhimin vendas, sepse e gjejnë më lirë atë të importuar. Kjo nuk është paaftësi, por një politikë e vetëdijshme qeverisëse, që favorizon importin dhe ndëshkon prodhuesin shqiptar. Rezultati është po aq i dukshëm: Fshatra që boshatisen, toka që mbeten djerrë, fermerë që falimentojnë.

Heqja e TVSH-së për autofaturimin nuk ishte reformë. Ishte një vendim i llogaritur mirë për të dobësuar bujqësinë kombëtare dhe për të hapur dyert e tregut për mallrat e huaja. Sot fshati po vuan, jo sepse i mungon toka apo puna, por, sepse i mungon një politikë mirëqeverisëse që e mbron.

Kriza jonë kombëtare nuk është në bujqësi! Kriza është në qeverisje!

Shqipëria ka tokë pjellore dhe njerëz me vullnet, por ka një shtet që i braktis ata. Në vend të mbështetjes, fermeri përballet me barriera që e shtyjnë drejt falimentimit dhe largimit nga vendi. Nëse kjo politikë nuk ndryshon, Shqipëria rrezikon të humbasë jo vetëm bujqësinë, por edhe vetë gjallërinë e fshatit, rininë.

Prandaj, kjo, nuk është vetëm një çështje ekonomike. Është një çështje kombëtare!

Duhet të hartojmë politika që mbrojnë prodhimin vendas, që garantojnë treg të drejtë për fermerët dhe që e shohin fshatin si themel të zhvillimit kombëtar. Nuk mundemi të qëndrojmë më në heshtje. Është koha të ngrihemi, të kërkojmë llogari dhe të imponojmë ndryshimin.

Vetëm kështu mundemi të shpëtojmë tokën, fshatin, rininë dhe të ardhmen tonë.

“KORÇA BOOM”