Nga Prokuror në krye të SPAK-Ut. Karriera e Klodian Brahos

Nga 19 Dhjetori 2025, Prokuroria e Posaçme Kundër Korrupsionit (SPAK) do të ketë një drejtues të ri. Altin Dumani largohet nga detyra dhe drejtimin e SPAK-ut e merr Klodian Braho. Braho u zgjodh me 7 vota, duke fituar ndaj kandidatëve të tjerë në garë: Adnan Xholi, Elvin Gokaj dhe Doloreza Musabelliu.

Kush Është Klodian Braho?

Klodian Braho u lind në Skrapar më 21 Korrik 1982. Në vitet 2000-2004 kreu studimet në Fakultetin e Drejtësisë, ndërsa në vitet 2005-2008 studioi në Shkollën e Magjistraturës. Ai mori emërimin si prokuror më 14 Nëntor 2007.

Karriera e Tij Profesionale

Braho ka mbajtur detyra të ndryshme në sistemin e drejtësisë:

• 14.11.2007 – 2012: Prokuror pranë Prokurorisë pranë Gjykatës së Rrethit Gjyqësor Berat.

• 2012 – 2015: Prokuror pranë Prokurorisë së Gjykatës së Rrethit Gjyqësor Vlorë.

• 2014 – 2015: Zv.drejtues i Prokurorisë pranë Gjykatës së Rrethit Gjyqësor Vlorë.

• 2015 – 19.12.2019: Prokuror në Prokurorinë pranë Gjykatës së Shkallës së Parë për Krimet e Rënda Tiranë.

  
  

Klodian Braho ka qenë pjesë e SPAK që nga krijimi i tij dhe aktualisht mban detyrën e shefit të seksionit kundër korrupsionit. Ai ka një rrugëtim të gjatë në hetimin e rasteve të korrupsionit dhe ka marrë pjesë në hetime të rëndësishme kombëtare.

Braho është prokurori që ka hetuar inceneratorin e Elbasanit, duke nxjerrë urdhër arresti për persona të njohur, përfshirë Mirel Mërtirin, Stela Gugalljën dhe Klodian Zoton, si dhe duke ndjekur hetimet ndaj ish zv/kryeministrit Arben Ahmetaj.

Me këtë përvojë të gjatë dhe të specializuar, Klodian Braho merr drejtimin e SPAK-ut me detyrë për të vijuar luftën kundër korrupsionit në nivele të larta.

"KORCA BOOM"