Orinda Huta pas vrasjes së gjyqtarit Kalaja: Frustrimi nga drejtësia është real, por të përkrahësh krimin është fundi

Moderatorja dhe këngëtarja Orinda Huta ka reaguar me tone të forta në lidhje me vrasjen e gjyqtarit Astrit Kalaja, duke e cilësuar si një “kambanë alarmi” për shoqërinë shqiptare dhe sistemin e drejtësisë.

Në një postim në rrjetin social Instagram, Huta shpreh habinë dhe shqetësimin e saj për reagimet që ka parë pas ngjarjes. “Nuk e besoj dot që njerëzit duartrokasin një veprim kafshëror. Edhe kjo është po aq e frikshme sa vetë ngjarja,” shkruan ajo.

Ajo tregon se vetë është përfshirë në një proces gjyqësor që ka nisur prej 15 vitesh dhe ende nuk ka kaluar në shkallë të parë. Bëhet fjalë për një çështje pronësie në familjen e saj nga ana e nënës, që vijon të mbetet pezull.

“Zoti e di sa do zgjasë… Jemi ende me shtetin. Por janë tokat e mamasë time dhe do i marr njësoj siç i takojnë të gjithëve që janë pjesëtarë,” shprehet ajo, duke shtuar se ka marrë edhe kërcënime gjatë viteve, nga persona të afërt.

“Kam marrë shpesh kërcënime nga të ashtuquajtur ‘daja’, që pse po kërkoja të drejtën e familjes time,” vijon Huta.

Në përfundim të reagimit, moderatorja nënvizon se, megjithëse kupton frustrimin që vjen nga vonesat e drejtësisë, kjo nuk mund të shndërrohet në arsyetim për dhunën dhe krimin.

“E njoh mirë frustrimin e proceseve të gjata pa fund, por që të biesh dakord me krimin e ta vlerësosh... Ky është fundi,” përmbyll ajo mesazhin e saj.

“KORÇA BOOM”