Riprogramimi i imunitetit, hap i ri drejt prodhimit të antitrupave të rrallë

Studiuesit kanë zhvilluar një metodë të re që mund të lejojë trupin të prodhojë proteina të dobishme, përfshirë antitrupa shumë të fuqishëm, por të rrallë duke riprogramuar sistemin imunitar, sipas Reuters.

Vaksinat tradicionale nxisin qelizat imune të quajtura qeliza B të prodhojnë antitrupa që njohin patogjenët.

Megjithatë, disa viruse si HIV mund të fshehin zonat e tyre më të ndjeshme pas molekulave të sheqerit që ngjajnë me indet e trupit, duke shmangur kështu reagimin imunitar.

Antitrupat e ashtuquajtur “gjerësisht neutralizues” mund ta kapërcejnë këtë mbrojtje, por ato prodhohen shumë rrallë dhe vetëm pas një procesi të gjatë mutacionesh.

Shumica e njerëzve nuk i zhvillojnë kurrë, edhe pas vaksinimeve të kujdesshme.

Për këtë arsye, studiuesit eksploruan mundësinë e “instalimit” të përhershëm të udhëzimeve për këta antitrupa në qelizat burimore që prodhojnë qelizat B.

Nëse këto qeliza programohen saktë, çdo qelizë B që krijohet më pas do të ketë të njëjtin “plan” për prodhimin e antitrupave të fuqishëm.

Në një provë fillestare, ekipi përdori teknologjinë CRISPR për të futur kodin gjenetik të antitrupave të rrallë direkt në qeliza burimore të papjekura, të cilat më pas u injektuan tek minjtë.

Këto u zhvilluan në qeliza B të programuara për të prodhuar antitrupat e projektuar.

Rezultatet treguan se edhe një numër i vogël qelizash të modifikuara mund të prodhojë sasi të mëdha antitrupash që zgjasin për një kohë të gjatë.

Metoda funksionoi kundër sëmundjeve si HIV, gripi dhe malaria.

Eksperimentet me qeliza burimore njerëzore dhanë gjithashtu rezultate premtuese, duke sugjeruar se kjo qasje mund të funksionojë në të ardhmen edhe tek njerëzit.

Sipas studiuesve, teknologjia mund të përdoret për trajtimin e një game të gjerë sëmundjesh nga infeksionet dhe sëmundjet metabolike deri te kanceri duke hapur rrugën për prodhimin e proteinave që shpëtojnë jetë./ Oranews

“KORÇA BOOM”