Rreziku i një pandemie globale nga H5N1 rritet, shkencëtarët paralajmërojnë masat e shpejta

Për vite me radhë, shkencëtarët kanë paralajmëruar se gripi i shpendëve mund të kalojë një ditë nga shpendët te njerëzit dhe të shndërrohet në një sëmundje globale. Tani, një studim shqetësues sugjeron se mund të mjaftojnë vetëm dy ditë që gripi nga shpendët, i njohur si H5N1, të shndërrohet në një pandemi.

Paralajmërimi vjen në një kohë kur Evropa ndodhet në prag të një përhapjeje të paprecedentë të virusit, me qindra milionë zogj të kultivuar që po asgjësohen për të ndaluar përhapjen e mëtejshme. Virusi H5N1 është i përhapur tek shpendët e egër. Midis shtatorit dhe nëntorit të këtij viti, rreth 1,500 shpendë të egër të infektuar janë identifikuar në 26 vende evropiane, katër herë më shumë se një vit më parë.

Shpërthime të gripit të shpendëve janë regjistruar edhe në fermat e Mbretërisë së Bashkuar. Ndërkohë, në SHBA, varianti H5N1 ka kaluar nga zogjtë tek gjitarët, përfshirë lopët, dhe ka infektuar punonjës të fermave.

Rastet te njerëzit mbeten të rralla. Nga viti 2003 deri në gusht 2025, Organizata Botërore e Shëndetësisë raportoi 990 raste H5N1 tek njerëzit në 25 vende dhe 475 vdekje, që përbën një shkallë vdekshmërie gati 50%. Në shkurt, SHBA raportoi vdekjen e parë njerëzore nga H5N1 për këtë vit, një burrë në të 60-at nga Luiziana.

Kur prek njerëzit, gripi i shpendëve shkakton simptoma të ngjashme me një formë të rëndë të gripit: temperatura të larta, kollë, dhimbje fyti dhe dhimbje muskujsh. Rreziku për popullatën e gjerë mbetet i ulët, por shkencëtarët frikësohen se mutacionet e virusit mund ta bëjnë atë shumë më të transmetueshëm, duke hapur rrugën për një pandemi të mundshme.

Kjo frikë e shtyu Universitetin A në Indi të zhvillojë një simulim kompjuterik për të parë se si H5N1 mund të përhapet pasi të kalojë te njerëzit dhe si mund të ndalet përpara se të dalë jashtë kontrollit.

Sipas raportimeve, një pandemi e gripit të shpendëve do të fillojë në heshtje, me një zog të vetëm të infektuar që transmeton virusin te një person, me shumë gjasa një fermer ose punonjës që ka kontakt me shpendët. Nga aty, gjithçka varet nga aftësia e virusit për t’u përhapur nga një person te tjetri.

“Kërcënimi i një pandemie H5N1 te njerëzit është real, por ne mund të shpresojmë të parandalojmë përhapjen e saj me një reagim të shpejtë të shëndetit publik”, tha Prof. Gautam Menon.

"KORCA BOOM"