Studioja holandeze MVRDV do të rikonstruktojë Pallatin e Sporteve "Asllan Rusi" me një projekt futurist në formën e një topi basketbolli

Studioja e njohur holandeze MVRDV është shpallur fituese e konkursit ndërkombëtar për projektin e ri të Pallatit të Sporteve “Asllan Rusi” në Tiranë. Propozimi i tyre, me një koncept inovativ dhe vizualisht mbresëlënës, parashikon që godina të marrë formën e një topi basketbolli, duke u kthyer në një ikonë të re arkitektonike për kryeqytetin.

Në konkurs morën pjesë gjashtë studio arkitekturore ndërkombëtare nga Franca, Portugalia, Zvicra, Kanadaja dhe Holanda. Projektet u vlerësuan nga një juri ndërkombëtare, e cila analizoi me kujdes çdo propozim bazuar në funksionalitet, risi arkitekturore, përfshirjen e elementëve urbanë dhe ndikimin që projekti do të ketë në komunitet.

Projekti fitues i MVRDV-së, në bashkëpunim me Likado BV, Albanian Capital Group sh.p.k, BCN Investments BV dhe Trema Tech sh.p.k, përveç hapësirave sportive dhe ambienteve për stërvitje, përfshin edhe një hotel, restorante, dyqane, ambiente argëtimi, hapësira të gjelbra dhe zona publike të aksesueshme për qytetarët.

Kjo nuk është hera e parë që MVRDV angazhohet në projekte të rëndësishme në Tiranë. Studioja holandeze është gjithashtu autore e ndërtesës ikonike me portretin e Skënderbeut në qendër të qytetit.

Gjatë prezantimit të rezultateve të konkursit, përfaqësuesi i jurisë theksoi se çdo projekt kishte vlera të veçanta. Ai përmendi se te ekipi çek u vlerësua integrimi i fasadës ekzistuese dhe i kopshtit në tarracë.

Një tjetër ekip propozoi një koncept inteligjent me dy trekëndësha dhe një rreth, duke organizuar mirë hapësirat publike. Ndërsa një projekt tjetër tregonte kujdes për kontekstin urban dhe ofronte një park të mirë, megjithëse me lidhje të dobët me infrastrukturën rrugore.

Pas një procesi të gjatë vlerësimi dhe diskutimesh, juria përzgjodhi projektin e MVRDV-së si më të mirin, duke theksuar se ky koncept jo vetëm që ofron një zgjidhje funksionale për aktivitetet sportive, por gjithashtu shton vlera kulturore dhe urbane për qytetin e Tiranës.

“KORÇA BOOM”