Vendimi i Këshillit Bashkiak: Titulli “Qytetar Nderi” për Ridvan Bode

Këshilli Bashkiak i Devollit ka vendosur me shumicë votash t’i akordojë titullin “Qytetar Nderi” ekonomistit dhe politikanit të njohur Ridvan Bode.

Bode ka një karrierë të gjatë në jetën publike të Shqipërisë, duke mbajtur disa nga detyrat më të rëndësishme në administratën shtetërore dhe në institucionet financiare të vendit. Ai ka shërbyer për disa mandate si deputet në Kuvendin e Shqipërisë dhe për një periudhë të gjatë ka mbajtur postin e Ministrit të Financave, duke drejtuar politikat fiskale dhe financiare në disa prej viteve më sfiduese për ekonominë shqiptare.

I lindur në zonën e Devollit, Bode ka përfunduar studimet e larta për financë në Universitetin Bujqësor të Tiranës dhe më pas ka kryer studime pasuniversitare në Francë, ku ka marrë edhe titullin Doktor i Shkencave Ekonomike.

Gjatë karrierës së tij ai ka mbajtur edhe poste të tjera të rëndësishme, mes tyre drejtues i Drejtorisë së Përgjithshme të Doganave në vitet ’90, si dhe përfaqësues i Shqipërisë në institucione financiare ndërkombëtare gjatë kohës kur drejtonte financat e vendit.

Pas përfundimit të angazhimeve aktive në politikë, ai ka vijuar kontributin në fushën e ekonomisë si anëtar i Këshillit Mbikëqyrës të Bankës së Shqipërisë, një nga strukturat më të rëndësishme që mbikëqyr stabilitetin financiar dhe sistemin bankar në vend.

Titulli “Qytetar Nderi”, i akorduar nga Këshilli Bashkiak i Devollit, vlerëson kontributin e tij shumëvjeçar në jetën publike dhe institucionale të vendit, si dhe lidhjen e tij me zonën e Devollit nga e cila ai ka origjinën.

"KORCA BOOM"